Deputeti socialist Fidel Ylli shpreh keqardhjen për analistin Ilir Demalia në lidhje me akuzat për kërcënim me armë në vitin 1995. Në një intervistë për gazetën Panorama, deputeti Fidel Ylli i cilëson mashtrime deklaratat e Demalisë, ndërsa tregon episodin e ndodhur 23 vjet më parë në bar “West”.
“Ky është një mashtrim sepse unë kur kam qenë oficer pranë kryeministrisë nuk kam mbajtur armë, e aq më tepër jo kur isha në biznes privat. Bar West ishte një ambient që mblidheshin gazetarët, politikanë, intelektualë, që nuk i mblidhja unë për të bërë opozitë qeverisë, por sepse miqtë e mi që unë i kisha gazetarë që nga njohja me kryeministrin dhe Gramoz Pashkon, Neritan Ceka, Teodro Keko, e ata që kishin krijuar Aleancën Demokratike prapa Gjykatës së lartë vinin pinin kafe të lokali im ngaqë njiheshim.
Mua më vjen keq me Syqin që ka qenë djali i lagjes, kemi patur shokë të përbashkët. Nuk e dija se ç’kishte botuar, por kur erdhi në lokal, erdhi me një eufori të madhe. Unë nuk i fola, ai filloi të ngacmonte ngaqë unë nuk po reagoja sepse kishte shkruar diçka për Pashkon. Unë nuk do i bëja avokatin Gramoz Pashkos, por i tërhoqa vëmendjen që të mos bërtiste sepse po prishte qetësinë, pasi në lokal siç e thashë mblidheshin intelektualë. I kërkova të ulte zërin, shaj këdo i thashë por mos bërtit se këtu je në lokalin tim. E kapa nga dora, nuk e godita dhe e nxora përjashta”, u shpreh Ylli.
I pyetur edhe për ndërhyrjen e Tom Doshit siç ka deklaruar Demalia, deputeti i PS u shpreh:
“Nuk ka lidhje fare Toma, ai ishte klienti im dhe nuk ka qenë farë pjesë e debatit tonë”.