Bie në prangat e policisë boksieri i njohur shkodran. Mësohet se 35- vjeçari është kapur në Tiranë, në një banesë të marrë me qira në zonën e “Komunës së Parisit”. Sipas informacioneve policore, ai ishte person i shpallur në kërkim gjatë operacionit “Oaz” që nga muaji shtator 2018. Mbi boksierin shkodran, disa herë kampion kombëtar, rëndojnë 4 akuza. Kapja e 35- vjeçarit u krye nga nga strukturat e policisë së Tiranës në bashkëpunim me ato të policisë së Shkodrës. Më poshtë, njoftimi i Policisë së Shtetit.
Policia e Shtetit ben me dije se kete mengjes, u bë ekzekutimi i Vendimit të Gjykatës së Shkallës së Parë për Krimet e Renda Tiranë, e cila ka caktuar masën e sigurise “Arrest ne Burg” për shtetasin Nelson Hysa, 35 vjeç , lindur dhe banues në Shkodër.
Ai ishte person i shpallur në kërkim në shtator 2018, gjatë operacionit “OAZ”, si i dyshuar për kryerjen e veprave penale “Organizata kriminale, “Kryerja e veprave penale nga organizata kriminale” dhe “Grupi i strukturuar kriminal”, “Paracaktimi i rezultateve në garat sportive, e kryer në bashkëpunim”, për qëllime të fitimit pasuror.
“Ai u kap në një banesë të marrë me qera në zonën e Komunës së Parisit Tiranë, gjatë operacionit të zhvilluar mëngjesin e sotëm nga Njësia Hetimore Qendrore në bashkëpunim me Drejtorinë e Forcës Posaçme Operacionale, në Departamentin e Policisë Kriminale dhe Prokurorinë e Krimeve të Rënda”- njofton policia.
Njësia Hetimore Qendrore për të lokalizuar vendndodhjen e personit të shpallur në kërkim ka bashkëpunuar me Drejtorinë Vendore të Policisë Tiranë dhe Shkodër.
Gjatë veprimeve proceduriale u sekuestrua nje automjet “BMW Seria 3”.
Materialet proceduriale shtesë iu referuan Prokurorisë Pranë Gjykatës së Shkallës së Parë për Krimet e Rënda Tiranë.
