
“Ekipi do të ketë një premio të konsiderueshme dhe këtë do t’ua them lojtarëve sa më shpejt”. Kështu u shpreh presidenti i Vllaznisë, Alban Xhaferi, në ditën e prezantimit të sponsorit gjeneral të klubit për sezonin e ri.
Ndërkohë, është mësuar nga burime në klubin shkodran, se bëhet fjalë për një shpërblim prej 50 mijë eurosh në rast se Vllaznia arrin të kalojë në turin e tretë të Ligës së Konferencës pas dy ndeshjeve që do të zhvillojë kundër Universitatea Kraiovës. Shifra e premios u është bërë e ditur edhe lojtarëve së fundmi.
Këtë edicion Vllaznia pati shansin e madh që ta niste përfaqësimin në Europë nga turi i dytë i Ligës së Konferencës, jo nga i pari siç ndodhi me Partizanin dhe Laçin.
Ky ndryshim u bë nga UEFA për të favorizuar skuadrat që kishin fituar trofe dhe duke qenë se Vllaznia e mbylli sezonin me Kupën e Shqipërisë, e nis rrugëtimin nga turi i dytë, jo nga i pari siç në ndodhi në edicionin e kaluar, ku kundërshtar kishte Shiroki Brijegun.
Klubi shkodran ka 450 mijë euro të sigurta përfitim nga UEFA edhe nëse eliminohet ndaj rumunëve.
Për bashkëpunime, publikime reklamash, njoftimesh në ShkodraWeb, mund të shkruani në SMS, Whatsapp, Viber +355 67 300 20 70 ose mail: info@shkodraweb.com në çdo kohë!