Prej vitesh, Visjan Ukcenaj është një nga aktorët e preferuar të “Portokalli”, më herët të spektakleve të tjera të humorit në vend, si “Apartementi 2XL” apo “Klanifornia”. Pakkush e dinte se ai kishte një lidhje me një gazetar të njohur, publicist, jo vetëm në Shkodër e Veri, por edhe më gjërë, Albert Vataj.
Ka qenë vetë “North King”, ai që e ka bërë publik këtë fakt, përmes publikimit të një dedikimi me Albert Vatën, duke zbukluar se është pikërisht daja i tij.
“Daja im. Një ndër njerëzit më të veçantë që njoh. Një njeri që di më shumë libra se një bibliotekë. Një njeri që të kthen pas në kohë me magjinë e shkrimit të tij dhe të bën të endërrosh historinë, bukuritë njerëzore e hyjnore, kryeveprat jetike të gjenive të njohur e të panjohur të historisë së njerezimit. Daja im, ai që Shqipen nuk e ka thjesht gjuhë, por arma e udhëtimit në kohë e hapësirë që kur lexon shkrimet e tij të bën të ndjesh aromat e kohës të shohësh ngjyrat në bardhëzitë e zbehta dhe të dëgjosh tingujt e viteve vetëm duke lexuar mënyrën se si ai shprehet. Daja im, ai që mori dhuratën më të madhe nga babai i tij pasionin për dijen, leximin librin dhe kulturën, ai që nuk përdori forcën e fizikut të tij shtatlartë por mendjes për tu përballur me sfidat e jetës. Ai që ndoshta u paragjykua për zgjedhjet e tij në jetë por era nuk e lëviz dot malin, thjesht e përkëdhel atë, ai që ka zgjuarsinë dhe pamjen e një lordi dhe mbart tek unë imazhin dhe fisnikërinë e gjyshit tim të ndjerë… Daja Im. Albert Vataj.”, shkruan Visjan Ukcenaj në dedikimin e tij në Facebook për dajën e vet.
Ndërkohë, i emocionuar, ka reaguar në rrjetet e tij sociale edhe vetë Vataj, i cili ka bërë një koment të shkurtër, pasi ka shpërndarë publikimin e nipit të tij, Visjan Ukcenaj.
“Më përlote nipi im, Visjan Ukcenaj për fjalën e përzemërt dhe përzemërsinë e dashurisë që më mëkove si bekim. Më preke, ndoshta më shumë se me gjithçka për privilegjin për të shkruar për mua. Jam mësuar të shkruaj për të tjerët, ti flasë me zë shpirti çdo akti krijues që më thërret në përulësinë e lartësimit të dijes. Dhe, kur ai dikush që ndalon të vështrojë me zemër dhe me fjalë, kthinën ku strukem për të mos rënë më sy, është ai që erdhi në jetën time si një shpërblim, atëherë vetë hyjnia e krijuesit më ka prekur me dritë. T’paça nipi im!”, shkruan gazetari dhe publicisti i njohur Albert Vataj.
Ky komunikim publik, bart mjaft ndjenja të sinqerta, vlera të familjes, siç është raporti nip e dajë. Është një shembull që duhet evidentuar dhe promovuar, pavarësisht se dy personat, janë të njohur në publik për vlerat që përfaqësojnë në fushat ku ata veprojnë. /ShkodraWeb/
