Prokuroria e Posaçme Anti-Korrupsion ka marrë në pyetje drejtorin e Teatrit Kombëtar, Hervin Çulin në kuadë të hetimeve për shembjen e godinës së teatrit.
Ai ka qëndruar për rreth 3 orë në SPAK ku ka dhënë deklarime mbi hetimet që po kryhen. Hetimet për shembjen e teatrit nisën pas kallëzimit të Aleancës për Mbrojtjen e Teatrit Kombëtar.
I pyetur nga gazetarët mbi detaje rreth marrjes në pyetje, Çuli u përgjigj se nuk kishte qenë aty dhe shtoi me shaka se kishte kryer një krim tjetër.
Pyetje: Për teatrin u morët në pyetje?
Çuli: Jo, kam kryer një krim tjetër…
Prokuroria e Posaçme kundër Korrupsionit dhe Krimit të Organizuar është duke kryer hetime për shpërdorim detyre gjatë procesit të miratimit të vendimit dhe ekzekutimit të tij duke e finalizuar me prishjen e godinës së Teatrit Kombëtar mëngjesin e 17 majit 2020.
Hetimi nisi pas kallëzimit të Aleancës për Mbrojtjen e Teatrit të bërë më 31 dhjetor 2019 dhe 23 janar 2020. Kallëzimi i bërë nga Partia Demokratike në lidhje me këtë çështje i është bashkuar këtij procedimi penal.
