Shkruan në Facebook kryetari i Bashkisë Malësi e Madhe, Tonin Marinaj: Në Bergamo pata nderin të jem mes vëllezërve dhe motrave Malësore, të cilët edhe pse larg vendlindjes, mbeten të lidhur fort me rrënjët e tyre. Jam shumë krenar për arritjet e tyre në Itali, arritje që i kanë fituar me shumë mund, përkushtim, mençuri, guxim dhe ndershmëri, duke nderuar jo vetëm Malësinë e Madhe, por edhe gjithë Shqipërinë.
Për vite me radhë kanë mbështetur familjet e tyre dhe kanë kontribuar në nisma komunitare që i kanë shërbyer gjithë Malësisë së Madhe. Ky është një shembull i jashtëzakonshëm i dashurisë për atdheun dhe ndjenjës së përgjegjësisë për rrënjët tona.
Si Kryetar i Bashkisë së Malësisë së Madhe, e konsideroj një privilegj t’i shërbej një komuniteti kaq të mrekullueshëm. I ftova të gjithë Malësorët të vazhdojnë të mbështesin zhvillimin e Shqipërisë, sepse sot emri i vendit tonë është më i fuqishëm se kurrë. Marrëdhëniet me shtetet më të rëndësishme të botës janë më të mira se kurrë më parë, duke krijuar mundësi të reja për të gjithë shqiptarët, kudo që ndodhen.
Dua që Diaspora jonë të jetë një zë i fuqishëm në mbështetje të Shqipërisë, ta promovojë atë dhe ta forcojë edhe më tej rolin e saj në arenën ndërkombëtare.
Faleminderit të gjithëve nga zemra që ishit sot në takim. Kjo është një thirrje për Atdheun dhe Diaspora jonë ka një rol thelbësor.
