Mentor Hasanaj, shefi i policisë bashkiake i cili mbeti i plagosur në një atentat ditën e djeshme ka treguar si ka ndodhur ngjarja. Në dëshminë e tij, ai ka deklaruar se as ai dhe as familja e tij nuk kanë ndonjë konflikt.
Sipas tij, ngjarja e ndodhur një ditë më parë nuk ka lidhje me detyrën e tij.
“Pas të shtënave pashë që unë dhe babai ishim plagosur. Mendoj që ngjarja nuk ka lidhje me detyrën. Nuk kam pasur asnjë debat kohët e fundit apo edhe më parë. Nuk kam asnjë konflikt, as babai dhe as familja ime. Kam qenë me familjen time në makinë dhe papritur na qëlluan dhe u munduam të shpëtojmë. Nuk kam asnjë ide se përse më qëlluan me armë”, ka dëshmuar Hasanaj, raporton News24.
Janë ende të paqarta arsyet e kësaj plagosjeje të dyfishtë, por Policia ka dyshime se kjo ngjarje lidhet me punën e shtetasit Mentor Hasanaj, si drejtor i Policisë Bashkiake në Bashkinë Malësi e Madhe. Policia vijon hetimet për zbardhjen e plotë të kësaj ngjarjeje, por edhe identifikimin, gjetjen dhe kapjen e autorëve që qëlluan ndaj familjes Hasanaj. Në afërsi të vendit të ngjarjes ka një sërë objektesh që kanë kamera sigurie dhe Policia i ka sekuestruar për të bërë këqyrjen e tyre dhe për të arritur tek identifikimi i autorit që qëlloi ndaj Xhelal Hasanaj dhe djalit të tij Mentor Hasanaj, ky i fundit drejtor i Policisë Bashkiake.
Menjëherë pas plagosjes së dyfishtë të shtetasve Xhelal Hasanaj dhe djalit të tij, Mentor Hasanaj, me detyrë drejtor i Policisë Bashkiake në Malësinë e Madhe, Policia vendore e Shkodrës ka ngritur dyshimet e para rreth autorit të kësaj ngjarjeje të rëndë. Burime pranë Policisë bëjnë me dije se kanë dyshime të forta se autori i ngjarjes mund të jetë një person me pagesë. Këto dyshime Policia i ka ngritur për shkak të mënyrës se si është bërë ky atentat ndaj familjes Hasanaj.
Dyshimet janë të forta se objektivi i këtij atentati është drejtori Mentor Hasanaj. Saktësia e autorit, i cili qëlloi nga larg dhe më pas në ecje e sipër me motor ka bërë që të krijohen dyshime se autori mund të jetë një atentator me pagesë. Sipas burimeve, personi i cili ka pasur një konflikt të hapur me drejtorin Hasanaj, ka porositur këtë atentat. Autori ka tentuar të vrasë drejtorin Hasanaj dhe pasi ka parë se e ka qëlluar është larguar me idenë se e ka lënë të vdekur në vend.
Të nderuar lexues dhe vizitorë të portalit tonë! Reklamat që shfaqen, mundësojnë që ShkodraWeb të vazhdojë të jetë e lirë dhe e pandikuar në përcjelljen e të vertetës. Faleminderit nëse i klikoni!
