Anila Denaj dhe Etilda Gjonaj uk janë më ministre në qeverinë Rama, por kryeministri- kryetar i PS- së u ka besuar poste politike dy zonjave. Denaj është tashmë sekretetare për Burimet Njerëzore ndërsa Gjonaj sekretare për Gruan.
Në këtë cilësi, ata do të jenë sot pasdite në një takim në selinë e PS- së Shkodër, ku do të diskutohet për riorganizimin e degës socialiste. Në një njoftim të shpërndarë për mediat informohet sa më poshtë:
“Pershendetje! Ne ora 16:00 ne seline e PS Shkoder te pranishme Anila Denaj dhe Etilda Gjonaj ne kuader te riorganizimit te ri te strukturave te PS. Kush ka deshire mund te marre pak plane ne fillim dhe me pas do kete prononcime ne fund te mbledhjes!”.
Situata në degën e PS- së Shkodër, nuk është më e mira e mundshme. Kjo u vu re edhe në takimin që sekretari i përgjithshëm Gjiknuri zhvilloi para disa kohëlve me strukturat e Shkodrës. Pati pakënaqësi sa i takon punësimeve dhe rolit të PSD- së në përfitimin e pozicioneve në drejtoritë rajonale.
Sipas gjasave, në të njëjtën frymë mund të jetë edhe takimi i sotëm. Prej shumë vitesh tashmë, PS Shkodër ka kryetar të komanduar dhe jo të zgjedhur. Aktualisht, në cilësinë e kryetares së PS- së për Qarkun Shkodër apo koordinatores është emëruar Edona Bilali, Ministre Shteti për Mbështetjen e Sipërmarrjes.
