Ndërsa kanë mbetur edhe pak orë nga nisja e “primareve” për përzgjedhjen e kandidatit të PD- së të drejtuar nga Komsioni i Rithemelimit, vjen një tjetër dorëheqje nga gara.
Mësohet se Lorenc Luka, aktualisht antëtar i Komisionit të Rithemelimit, është terhequr nga futja e emrit të tij në votimin e ditës së diel, 30 janar 2022, për kandidaturat që do ti paraqiten demokratëve për përzgjedhje paraprake.
Kjo terheqje, nënkupton se Luka nuk do të mund të jetë kandidat për kryetar bashkie në Shkodër, përsa kohë është përcaktuar se emri final do të dalë pikërisht nga kjo garë brenda demokratëve.
Lorenc Luka ka qenë për dy mandate radhazi kryebashkiak i Shkodrës, ndërsa ka mbajtur postin e kryetarit të Këshillit të Qarkut Shkodër por edhe atë të kryetarit të degës vendore të PD- së.
Tërheqja e Lukës nga “primaret”, vjen pas disa tërheqjeve të tjera, mes të cilave dy janë bërë publike: Ardit Çylybyli, zëvendëskryetar aktual i Bashkisë Shkodër dhe Ergys Ivziku, kryetar grupseksioni në PD Shkodër.
Ditën e sotme, Komisioni i Rithemelimit pritet të përcaktojë emrat që demokratët e Shkodrës janë të thirrur të votojnë në “primare” me 30 janar 2022. Pritet që ky numër të mos jetë më shumë se 4-5 kandidatura.
Në procesin e propozimeve, seksionet e grupseksionet kanë konverguar në rreth 20 emra kandidatësh, nga të cilët rreth 11 kanë plotësuar formularin për të hyrë zyrtarisht në “primare”. Orët e fundit, kanë nisur tërheqje të disa kandidatëve, proces që mund të vazhdojë.
