Kodi i mbretit Charles III është zbuluar, duke treguar një imazh që do të përdoret nga departamentet qeveritare, në dokumentet shtetërore dhe kutitë postare.Ai u zgjodh personalisht nga Mbreti, nga një sërë modelesh të prodhuara nga Kolegji i Armëve.
Monogrami kombinon “C” dhe “R” për Rex, latinishtja për mbret, si edhe “III” për mbretin e tretë Charles.Kodi, një identitet vizual për mbretërimin e ri, zëvendëson E II R të Mbretëreshës Elizabeth II. Do të ketë ndryshime të tjera përpara për të shënuar mbretërimin e ri të mbretit Charles:
-Banka e Anglisë thotë se kartëmonedhat e reja me portretin e mbretit Charles III “pritet të hyjnë në qarkullim nga mesi i vitit 2024”, me imazhin që do të zbulohet para fundit të këtij viti.
– Royal Mint informon se do të prodhohen monedha të reja dhe do të shfaqen “në përputhje me kërkesën nga bankat dhe zyrat postare”.
Nuk ka një datë të caktuar se kur do të jenë në përdorim, por një imazh i monedhave të reja të Mbretit Charles do të shfaqet përpara se ato të hyjnë në qarkullim.
Ekziston një traditë, ku profili i monarkut të ri në monedha vendoset në drejtim të kundërt me paraardhësin e tyre.
Kartëmonedhat dhe monedhat ekzistuese do të vazhdojnë të jenë të vlefshme, me kartëmonedhat dhe monedhat e Charles dhe Elizabeth që do të përdoren krahas njëra-tjetrës.
Royal Mint thotë se ka rreth 27 miliardë monedha nga mbretërimi i Mbretëreshës Elizabeth II në qarkullim. Ndërsa pullat e reja me Mbretin Charles “do të hyjnë në qarkullim pasi të kenë mbaruar rezervat aktuale të pullave”.
Por një grup prej katër pullash përkujtimore do të publikohen në nëntor, duke treguar portrete të Mbretëreshës Elizabeth II të realizuara në faza të ndryshme gjatë mbretërimit të saj.
Me përfundimin e periudhës së zisë mbretërore, për herë të parë do të përdoret kodi i ri i mbretit Charles.
Ky monogram personal i monarkut të ri do të aplikohet për herë të parë në dhomën e postës së Pallatit Buckingham të martën, ku do të përdoret për letrat nga familjet mbretërore.
Është një imazh që do të fillojë të përdoret më gjerësisht, nga uniformat, tek artikujt zyrtarë të shkrimit e deri tek ndërtesat publike.
Ekziston një version i veçantë i kodit për Skocinë, i cili përmban kurorën skoceze. Por nuk do të ketë një ndryshim të papritur në kutitë postare.
Ka ende kuti në përdorim që nga mbretërimi i Mbretëreshës Victoria, Edëard VII, George V dhe VI, dhe shifrat origjinale mbeten derisa kutitë duhet të zëvendësohen.
Pothuajse 70,000 nga kutitë postare aktuale, rreth 60% e totalit, datojnë nga mbretërimi i Mbretëreshës Elizabeth II. Ka vetëm rreth 170 nga mbretërimi i shkurtër i Eduardit VIII, i cili abdikoi në 1936.
Kutitë që janë gati për instalim do të vazhdojnë të kenë kodin e mbretëreshës së ndjerë, thotë Royal Mail.
Aty ku shifrat mbretërore shfaqen në ndërtesa, do të jetë në dorën e organizatave individuale të vendosin se kur ose nëse do të përditësohen.
