Ish-presidenti i Turbinës, Gentjan Gjoka, zbardhi edhe arsyet e dorëheqjes gjatë një deklarate të dhënë për mediat. Gjoka fajëson kryebashkiakun e Cërrikut Altin Toaska, ndaj të cilit nuk kursen as akuzat publike.
“E ndiej si detyrim moral të ndaj dy fjalë me ju, tifozët e ekipit dhe të gjithë dashamirësit. Unë, presidenti i klubit ‘Turbina’, jap dorëheqjen për arsye se kryetari i bashkisë dhe larot e tij, të cilët duan të vjedhin 5 mijë lekësha dhe të abuzojnë aty ku nuk duhet, nuk ndjekin strategjitë e mia për të shpëtuar ekipin prej rënies nga kategoria. Me vjen keq, se kam 13 vjet që jap djersën për këtë klub dhe të gjithë e dinë se në çfarë gjendjeje e mora ekipin dhe ku e çova.
Gjithçka e kam bërë pa pasur as përfitimin më të vogël, vetëm e vetëm për nder të atij qyteti ku jam rritur dhe në nder të babait tim. Ju uroj më të mirat, por e shoh shumë të vështirë, për aq kohë sa aty do sundojnë njerëz që mendojnë vetëm për xhepat e vetë dhe larot që i rrinë nga pas”.
