Mbrëmjen e kaluar, Vllaznia ka zhvilluar një ndeshje mjaft të mirë përballë Tiranës, të cilën kuqeblutë e dominuan plotësisht. Megjithatë, goli dhe 3 pikët aq të vlefshme, nuk u arritën edhe për mungesë fati.
Në këtë ndeshje, nuk kanë munguar as incidentet qoftë në fushën e blertë, ashtu edhe në shkallët e “Air Albania”. Tifozët vendas i sulmuan ata kuqeblu me gazin e bombulave zjarrëfikëse, mesa duket të frymëzuar nga zhvillimet aktuale politike. Nga ana e tyre, miqtë reaguan duke hedhur disa karrige të stadiumit. Policia ka shoqëruar tre tifozë, të cilët janë proceduar edhe penalisht.
Ndërkohë, në fushë ka qenë një tjetër incident, që sipas jo pak tifozëve, ndikoi edhe në ecurinë e lojës. Da Silva u dëmtua në fytyrë gjatë ndeshjes nga një ndërhyrje e pavullnetshme e kundërshtarit. Ndeshja u ndalua për disa minuta për ti ardhur në ndihmë brazilianit. Latifi bëri me shenjë nga pankina, duke kërkuar zëvendësim. Teksa Da Silva po mjekohej jashtë fushe, Mustedanagiç hyri si zëvendësues i tij në fushë. Pasi ka mësuar zëvendësimin, Da Silva ka reaguar ashpër ndaj trajnerit Brdariç, duke përdorur edhe fjalë fyese në anglisht.
Ndërkohë, mjeku i Vllaznisë Ilirjan Haxhaja, përmes një publikimi në Facebook ka treguar dinamikën e ngjarjes, duke thënë se stafi mjekësor kërkoi zëvendësimin e Da Silvas. Ai ka rreshtuar edhe arsyet e kësaj kerkese, duke lënë të kuptohet se ndërrimi i Da Silvas ishte i detyrueshëm.
“Ju falenderoj për disa komente, si të mira dhe të këqija. Dua të sqaroj se ka një rregullore për dëmtimet në kokë dhe ne si staf mjekësor ja kërkuam tranjerit që ta zevendësojë lojtarin. Kur ka ma shumë se dy qarje dhe shumë gjak arbitri vështirë ta lejojë në lojë lojtarin. Plus në ate rast kishim disa qarje, plus i kishte renë dhe lentja syrit.
Si mund të lozte ai dhe pse ai kishte dëshire për të luajtur ? Por mbas 7 minutash në dhomat e stadiumit nuk ishte mirë. Ju lutem na mirkuptoni, ne kemi shëndetin e lojtarit para lojës. Plus ka rregullore të traumës sportive, që ne ndjekim. Ju falenderoj dhe një herë. Dhe një falenderim per lojtarin tonë Viktor Da Silva, që kishte dëshirë të ndihmonte ekipin e tijë.
Na fal Viki, por ne të stafit mjekësor në disa raste na duhet të vendosim për të mirën e sportistit dhe jashtë dëshirës së sportistit. Forca Vllaznia.”, shkruan Haxhaja. /ShkodraWeb/