Ditën e sotme ka nisur zyrtarisht punën drejtori i policisë për qarkun Shkodër, Drejtues i Parë Fatmir Lleshaj, i prezantuar para efektivëve një ditë më parë nga ministri i brendshëm Ervin Hoxha dhe drejtori i përgjithshëm i Policisë së Shtetit Drejtues Madhor Ilir Proda.
Në mëngjes, në zyrën e tij Lleshaj ka zhvilluar një takim prezantues me gazetarët e Shkodrës. Më pas, ai është pritur nga kryebashkiaku i Shkodrës, Benet Beci. Ka qenë ky i fundit, që përmes një publikimi në rrjete sociale, ka njoftuar për këtë takim.
“Pata kënaqësinë të prisja sot në zyrë Drejtorin e ri të Policisë Shkodër, Drejtuesin e Parë, Fatmir Lleshaj. E urova për detyrën dhe i ofrova mbështetjen time maksimale në përmbushjen e misionit të rëndësishëm të garantimit të rendit e sigurisë banorëve të Shkodrës.”, shkruan kryebashkiaku Beci në Facebook.
