Projekti për parandalimin e gërryerjes së tokës në Berdicë të Shkodrës, po shkon drejt përfundimit. Këtë e pohon Prefektja e Qarkut Shkodër Majlinda Angoni, e cila sot ka parë nga afër ecurinë e punimeve që po kryhen, e shoqëruar edhe nga kryetari i Këshillit të Qarkut Shkodër Hilmi Lakti.
Në faqen zyrtare në Facebook, Angoni ka publikuar disa foto, të cilat i ka shoqëruar edhe me një informacion të shkurtër. Prefektja Majlinda Angoni shkruan:
“Në inspektim të zbatimit të projektit për parandalimin e gërryerjes së vazhdueshme të tokave bujqësore nga Lumi Drin në Njësinë Administrative Bërdicë problematike shqetësuese ngritur dhe në Komisionin e Mbrojtjes Civile Prefektura Shkodër, e cila ka marrë zgjidhje dhe po ecën drejt përfundimit.
Me nxitjen Prefekturës Shkoder nisi faza e ndërhyrjes mbështetur nga Ministria e Bujqësisë, ka parashikuar krijimin e pritave me lumin në parandalimin e gërryerjes duke i dhënë zgjidhjen përfundimtare fenomenit dhe shqetësimit të banorëve në afërsi të kësaj zone, ndërkohë që inspektimet në terren do vazhdojnë së bashku me grupin e punës Prefektura Shkodër.”.
Problemi i gërryerjes së tokave në Shkodër është mjaft i mprehtë. Me qindra herë, përmes mediave, banorë të Berdicës por edhe zonave të tjera, e kanë ngritur këtë problem duke kërkuar edhe ndërhyrjen e autoriteteve shtetërore.
Një nga zonat ku ky fenomen ka patur ndikim jashtëzakonisht negativ, është Guri i Zi. Janë dhjetra hektarë tokë bujqësore e punueshme, që është marrë përpara nga lumi. Deri në këto momente, nuk ka informacion për projekt të zbatuar në atë zonë.
