“I fortë na dolle more Gjino…”, “kushtetuesi” Bashkim Dedja rrëzoi sot zyrtarisht vettingun…
Vendimi i pak minutave më parë i Komisionit të Pavarur të Kualifikimit i mundëson kryetarit të Gjykatës Kushtetuese Bashkim Dedja të vazhdojë detyrën e tij të lartë. Pavarësisht gjetjeve të rënda në deklarimet e pasurisë së Dedjes, trupa e KPK-së vendosi të mos i marrë parasysh.
Pas “cungimeve” të forta të Gjykatës Kushtetuese në ditët në vijim, mendohej e vështirë që edhe vetë kreu i saj të binte në “rrjetën” e vettingut. Megjithatë njerëzit e thjeshtë mendonin se “Drejtësia e re” ishte jo vetëm qorre (e verbër) por edhe shurdhmemece përballë atyre që gjykonte.
Por sot nuk ndodhi kështu. Bashkim Dedja rrëzoi përfundimisht “madhështinë” e vetting-ut të famshëm. Si pjesa dërrmuese e gjyqtarëve dhe prokurorëve, edhe Dedja kishte probleme në deklarimet e pasurisë. Prona të blera me kredi pa interes nga familjarët e tij, vila jo në rponësi të tij por të cilave u paguhej energjia dhe uji nga kryegjykatësi etj. Për këtë të fundit, justifikimi i paraqitur para KPK-së nga avokati i tij Maks Haxhia, ishte më shumë se qesharak. I kishte kaluar kontratat e ujit dhe të dritave në emrin e tij, që vëllai të mos vinte çdo muaj nga Dibra për të bërë pagesat. Dhe KPK “e ha sapunin për djath” edhe pse më injoranti e di se pagesat mund të blhen nga posta, nga banka edhe nga fundi i botës.
Por këto duken “detaje të vogla”. Ajo që bie në sy është shumëfishimi me koeficent të lartë i pasurisë së Bashkim Dedjes, plot 17 herë nga nisja e karrierës. Edhe kjo shfër mbase nuk thotë shumë, por të mos konkretizohet. Çdo vit, pasuria e tij është rritur me rreth 29 milion lekë të vjetra ose mesatarisht 2.5 milion lekë në muaj. Edhe më budallai e kupton se me nivelin e rrogave në Shqipëri, edhe po të mos ushqehesh fare, të mos pish kafe dhe cigare, të mos veshesh dhe të mbathesh, të mos bësh pushime brenda e jashtë vendit, është e vështirë të kursehen 2.5 milion lekë cdo muaj. KPK jo vetëm ka mbyllur sytë, veshët e gojën, por ka bërë “off” çdo qelizë të trurit të antarëve të saj por edhe të shqiptarëve. Madje avokati Maks Haxhia, pasi ka marrë vendimin e KPK-së, para mediave nuk ka kursyer as relatoren nga akuzat direkte apo indirekte.
Ja pra që edhe nga vetting-u paska njerëz që janë më të barabartë se të tjerët para tij! Çështja që mund të shtrohet në këtë rast, përveç rrëzimit “hundë e buzë” të vetting-ut nga “i forti” i drejtësisë supreme në vend, është: KPK e mori në liri të plotë vendimin apo…dikush ndërhyri tek “drejtësia e re” siç ndodhte edhe me atë të vjetrën? KPK gaboi me dëshirë apo i thanë “gabo se nuk ka problem në këtë rast”?! Sepse gjithmonë mbi Kushtetutën, mbi ligjet është “Dikush” më i fortë…
Si edhe shumë raste të tjera, asnjëherë nuk do të merret vesh e verteta. Por nuk mund të mbulohet asnjëherë rrëzimi i vetting-ut nga kryetari i Gjykatës Kushtetuese. Asshtu siç edhe krijohet një precedent i rrezikshëm që paragjykon çdo vendimmarrje të “drejtësisë së re”. E në fund, atyre që u rrëzuan nga vetting-u edhe për më pak mëkate së shefi i “Kushtetueses”, u mbetet në gojë një shije e keqe. Por mesa duket, nuk kanë qënë pjesë e projektit fillestar të “drejtësisë së re”. “I fortë na dolle more Gjino”, do të thuhej në një batutë të një filmi që i ka rezistuar kohës akoma…/Nga Blerti DELIJA/