Hysaj: Luajmë ndaj një kundërshtari të vështirë, grupi është fantastik

Elseid Hysaj ishte një nga të përzgjedhurit e kombëtares i cili është paraqitur sot para mediave për ndeshjen e së hënës që Shqipëria do të luaj kundër Turqisë. Hysaj deklaron se kjo përballje është e një niveli të lartë dhe se do t; shërbej shumë ekipit. Sa u takon prurjeve të reja, mbrojtësi i krahut të djathë shprehet se edhe ata janë përshtatur menjëherë me grupin.

Për miqësoren ndaj Turqisë

“Besoj që do jetë një ndeshje e bukur, e dimë që do të luajmë ndaj një kundërshtari shumë të vështirë, megjithatë kemi patur kohën e nevojshme për ta përgatitur në mënyrën më të mirë këtë sfidë. Gjatë kësaj periudhe ne futbollistët jemi njohur më mirë me njëri-tjetrin por edhe me trajnerin.

Do të jetë një ndeshje kontrolli, për të kuptuar se ku kemi arritur dhe në çfarë forme jemi. Turqia është një skuadër shumë e fortë ka lojtarë të nivelit të lartë që luajnë në klube shumë të mira. Ky do të jetë një test impenjativ për ne që do të bëjë të kuptojmë se cili është potenciali ynë i vërtetë. Nëse fitojmë do të merrnim shumë vetëbesim për të ardhmen”.

Për kualifikueset e përfunduara në vendin e tretë

“Ishim në një grup me Spanjën dhe Italinë dhe nuk duhet të anashkalojmë kurrë këtë fakt. Për ne eliminatoret e Botërorit ishin shumë të vështira. Vendi i tretë ishte pozitiv për ne, megjithatë duhet të shohim se ku kemi gabuar, për të sistemuar ato gabime në mënyrë që të përgatitemi sa më mirë për eliminatoret e Europianit të ardhshëm”.

Për grupin e lojtarëve

“Grupi është fantastik, edhe lojtarët e rinj që kanë ardhur janë përshtatur menjëherë dhe mendoj që do të na japin një dorë për të arritur rezultate sa më pozitive”.

Për pozicionin si mbrojtës i majtë te Napoli

“Në klubin tim kam luajtur si mbrojtës i majtë edhe përpara tre vitesh por të rikthehesh në atë rol pas një periudhe kaq të gjatë është pak e vështirë, megjithatë unë jam i gatshëm aty ku ma kërkon trajneri dhe ku ka nevojë skuadra”.

Për titullin kampion me Napolin

“Fitimi i kampionatit do të ishte diçka shumë e madhe për Napolin, pasi kemi 30 vjet që e presim këtë mundësi. Ky është sezoni i duhur për t’ia arritur qëllimit. Humbëm një futbollist të rëndësishëm si Gulam por kemi lojtarë të tjerë me peshë në skuadër dhe besoj që do t’ia dalim”.