Humbja me Skenderbeun, Gjoka: Vllaznia duhet te behet me mentalitet fituesi!

Trajneri i Vllaznisë, Ernest Gjoka, mendon se sot diferencën e bëri cilësia e Skënderbeut. Në deklaratën e dhënë pas ndeshjes për “Supersport”, ai kërkoi nga lojtarët e tij që të ndryshojnë mentalitetin pasi pa mentalitet fitues nuk mund të ecet përpara.

Humbja

“Këto janë diferencat e skuadrës së mirë. Duhet të ishim më të kujdesshëm që mos pësonim gola të tillë, por lojtarët dhanë maksimumin për të bërë atë që kishim përgatitur. Me pak fat do kishim shënuar dhe mund të ishte ndryshe rrjedha e ndeshjes, por ekipi i mirë bën diferencën.”

Moskuptimi i Atsinës me Hasanin

“Janë gjëra që ndodhin, s’kemi ç’bëjmë, janë gjëra të ditura në futboll. Nëse do mirëkuptohej me Edonin ndoshta do shënohej, por e rëndësishme që duam të rritemi. Duhet te vrasim frikën dhe të kemi më shumë besim, të kuptojmë që kampionati është garë e gjatë dhe rëndësi ka të fitohen pikët.”

Nëse do ishte luajtur në Shkodër, do ishte tjetër ndeshje?

“Sigurisht që të luash në shtëpi është tjetër gjë, është plus ndaj kundërshtarit, por mos harroni që këto janë gjëra që ndodhin në futboll. Ne erdhëm në Korçë, fazën tjetër do vijnë ata në Shkodër.”

A do kërkohet sulmues në merkato? Ndaj Lushnjës ku do luhet?

“Mendoj që sulmuesi që kemi duhet të vijë akoma më shumë në formë sepse ka pasur dëmtim të gjatë dhe kjo e pengon. Merkato është larg, duhet të marrim më të mirën nga lojtarët që kemi.

Nuk mund ta jap unë këtë përgjigje. Nuk e di se ku do luajmë ndaj Lushnjës.”

Loja e praktikuar sot

“Duke njohur Skënderbeun në detaje menduam të kishim sulm të shpejtë dhe të saktë. Mund të kishim shfrytëzuar më mirë disa raste por duhet të rritemi akoma dhe të ndryshojmë ritëm dhe mentalitet. Duhet ta kuptojnë të gjithë te Vllaznia që pa u bërë me mentalitet fituesi nuk mund të ecet dot përpara.”

Kalendar i vështirë në 3 ndeshjet e para

“Unë e thashë që në kampionat duhen pikët pavarësisht kush ishin kundërshtarët. Ne duhet të bëjmë maksimumin pa u justifikuar.”

Pranimi për t’u luajtur në Korçë

“Të gjithë ne u munduam të gjejmë zgjidhjen më të mirë. Kërkuam zgjidhje tjetër , nuk u realizua dhe u deturuam të pranonim këtë verdikt .”