Mbesa e dëshmorit të 2 prillit, Nazmi Kryeziut, ish-deputetja e PD, Izmira Ulqinaku ka reaguar pas ftesës që Rudina Hajdari i bëri maxhorancës në Parlament, për nderuar me një minutë heshtje, 4 dëshmorët e demokracisë. Në një reagim në Facebook, Izmira Ulqinaku ka thënë se paqen e dëshmorëve të votës së lirë e prish ekzistenca e Gramoz Ruçit. Ulqinaku thotë se shpitrtrat e tyre do të paqtohen kur Ruçi dhe Rama do të ndëshkohen nga vota e lirë. Më poshtë postimi i plotë i ish- deputetes së PD-së Izmira Ulqinaku.
“U ndjeva e tradhëtuar sot, kur dëgjova se vrasësit e Dëshmorëve të 2 Prillit ishin ftuar t’i nderojnë ata me 1 minutë heshtje në Parlament!
Një teatër mjeran që uron për paqen e shpirtrave të Dëshmorëve të Demokracisë nga Parlamenti i diktuar prej votës së blerë nga krimi i organizuar dhe bandat e pushtetit.
Paqen e dëshmorëve të votës së lirë e prish ekzistenca Gramoz Ruçi, ekzistenca e partisë së Sigurimit të Shtetit e Byrosë Politike, që sërish sot ka shkelur mbi votën e lirë, e mbi gjakun e atyre shpirtrave që s’po i lini të prehen në paqe!
Gramoz Ruçi dhe Edi Rama! Shpirtat e tyre do të paqtohen ditën kur ju të ndëshkoheni nga vota e lirë! Dhe ajo ditë po afron!”, shkruan Ulqinaku.
