Këshilltari diplomatik i kryeministrit Edi Rama, Pirro Vengu, u shpreh krenar për dokumentin e ri për strategjinë e zgjerimit të paraqitur gjatë javës.
Në një prononcim në emisonin “JAVA”, Vengu deklaroi se “Strategjia është një lajm i mirë për Shqipërinë dhe Qeverinë gjithashtu. Është një udhërrëfyes që flet shkoqur dhe vlerëson afatet për reformat dhe çeljen e negociatave” duke shtuar se “Qeveria është e angazhuar për çeljen e negociatave për 6 muaj”.
I pyetur nëse Shqipëria e gjen veten me disa konstatime të Dokumentit të Zgjerimit për “Rrezikun e kapjes së shtetit, përzierjen e interesave private me ato publike si dhe luftën ndaj krimit të organizuar dhe korrupsionit”, Vengu theksoi se “ky nuk është një Progres-Raport për situatën në Shqipëri por një dokument i përgjithshëm për të gjithë vendet e Ballkanit Perëndimor” dhe se “Shqipëria e gjen veten pjesërisht në këto konstatime të dokumentit, por nuk rënditet në vendet problematike në këtë drejtim”
Analisti Lorenc Vangjeli, duke ironizuar keqpërdorimin e deklaratave të ndërkombëatrëve për Shqipërinë, theksoi se “ Shqiptartët e dinë shumë më mirë se kush janë problemet e tyre” duke shtuar “se qeveria duhet të angazhohet për heqjen e damkës së Shqipërisë si një vend trafiqesh. Shkrimet dhe kronikat në media prestigjoze si Revista Stern apo dhe të tjera mund të pengojnë çeljen e negociatave”.
Në komentin e tij, analisti Preç Zogaj tha se “pavarësisht se prezantimi i dokumentit është një lajm pozitiv, ne duhet të mësohemi të shohim dhe të lexojmë se kush janë konstatimet që mund të jenë pengesat për axhendën europiane të Shqipërisë në mënyrë që të përballemi me to”.
“Ne kemi bërë progres të qënësishëm edhe nëse nuk hapen negociatat”, tha keshilltari i kryeministrit./panorama/
