Siç është paralajmëruar prej ditësh, nesër në Gjykatën e Apelit në Shkodër do të zhvillohet seanca për vlerësimin e masës së sigurisë për 11 kuksianët që janë arrestuar pas protestës në “Rrugën e Kombit”. Kjo seancë pritet të shohë edhe angazhimin total të opozitës shqiptare. Burime të besueshme thonë për ShkodraWeb se opozita po përgatit një skemë mbështetëse për 11 të arrestuarit.
Mesohet se grupet parlamentare të opozitës, përkatësisht të PD-së dhe LSI-së do të jenë në Shkodër, madje në afërsi të Gjykatës së Apelit ku do të zhvillohet edhe gjyqi. Natyrisht, pritet që nga Kukësi të vijnë edhe të afërm dhe të njohur të 11 të arrestuarëve ndërsa nuk përjashtohet mundësia të ketë edhe qytetarë nga qytetet e tjera të vendit.
Opozita e ka bërë të qartë tashmë se 11 kuksianët janë arrestuar në shkelje flagrante të ligjit dhe po mbahen padrejtësisht në burg me urdhër të kryeministrit Rama. Në këto kushte, deputetët e opozitës kanë zgjedhur të japin mbështetje maksimale për kuksianët e arrestuar dhe akoma në burg. Në orët në vijim, pritet të ketë më shumë informacion lidhur me këtë nismë më të fundit të opozitës.
