“RD” gazeta zyrtare e PD ka nxjerr me urgjence nje shkrim online, me te cilin tenton te sqaroje se si ndodhi qe dy vota u shenuan me shume ne favor te Rucit ne krye te Kuvendit, duke aluduar se vinin nga PD. Ne “RD” shkruhet: “Përfundimi i votimit për zgjedhjen e Gramoz Ruçit kryetar Kuvendi, është shoqëruar me debate të ashpra e të forta, për shkak të dy votave “pro” sikurse u theksuan të opozitës. Ruçi mori 80 vota, nga të cilat 74 janë vota të deklaruara të PS, ndërsa katër vota janë nga aleatët e tij në Parlament. Pikëpyetja lindi mbi dy votat e tjera që janë hedhur për Ruçin.
Nxitimi për të baltosur PD-në, në kushtet e një votimi të fshehtë dhe të mungesës së “provave”, tingëllon më shumë si një diversion ndaj PD-së dhe Lulzim Bashës, diversion i shpërndarë nga mediat dhe amplifikuar nga njerëz me inate të mëdha, që mbetën jashtë listave të PD, për deputetë.
Mjafton një analizë e thjeshtë, që askush deri tani nuk e ka bërë për të mos përjashtuar dhe pse jo, pranuar e pohuar se ato dy vota, nuk janë të PD-së.
Por të kujt janë? Duhet analizuar me kujdes fakti se çfarë ndodhi gjatë votimit. PD kishte deklaruar votën kundër. PD po ashtu nuk caktoi përfaqësuesin e saj në komisionin e numërimit të votave. Ky ka qenë një rreng i vogël politik i PD. Demokratët kanë dashur t’u tregojnë edhe një herë tjetër shqiptarëve se si mund të administrojë një proces të thjeshtë votimi dhe publik Partia Socialiste. Dje u vodh dhe u manipulua edhe rezultati i votave për Ruçin. Kjo i ka interesuar Ramës dhe nuk e ka pasur problem që në një komision të kontrolluar prej tij të shtojë dy vota më shumë për të kaluar barrën e përgjegjësisë me këtë manipulim edhe tek demokratët. Gjithçka ka qenë e qëllimshme për të spostuar vëmendjen e opinionit nga zgjedhja e një xhelati të diktaturës në krye të Parlamentit tek dy votat e opozitës. Dhe në të vërtetë e ka arritur disi Rama. Mediat e kontrolluara prej tij i kushtuan shumë pak rëndësi procesit të administrimit të votave që u bë vetëm nga PS.
Nënkuptimi është i qartë. Mosmarrja pjesë e opozitës në komisionet e votimit do të sjellë standardin e diktaturës në komisione, ku ashtu si në kohën e Gramozit shkruheshin dëshmitë e rreme në dosjet që çonin njerëz në litar, burgime apo internime. Në këtë pikë kanë eksperienca si Gramozi personalisht, ashtu edhe Rama familjarisht. Në këtë seancë të parë shqiptarët panë se si Rama dhe Ruçi mund të vrasin edhe votën e deputetëve, jo vetëm të shqiptarëve sikurse bënë më 25 qershor”, thuhet në shkrimin e Rilindjes Demokratike.
