Garon me 6 mars për Bashkinë e Shkodrës përballë Spahisë dhe Angonit, Xhemal Bushati publikon sloganin elektoral

Ndërsa janë bërë të njohur tre kandidatët që do të garojnë me 6 mars 2022 për Bashkinë e Shkodrës: Bardh Spahia i “Shtëpia e Lirisë”, Majlinda Angoni e PS- së dhe Xhemal Bushati i PD- së zyrtare, ky i fundit ka bërë publik posterin e parë por edhe sloganin që do të përdorë për fushatën e tij.

Para disa ditësh, Bushati ka hapur edhe faqen e tij në Facebook, ku ka publikuar edhe posterin e parë elektoral. “Me dashni për Shkodrën, me përkushtim për ju”, duket se do të jetë slogani i kësaj fushate për përfaqësuesin e PD- së zyrtare në garën për Bashkinë e Shkodrës.


Xhemal Bushati ka lindur dhe është banues në qytetin e Shkodrës. Është bashkëshort dhe baba i tre femijëve, një djali dhe dy vajzave, gjysh i një mbese.

Ai ka përfunduar studimet e larta për Ekonomik në Universitetin e Tiranës dhe që nga viti 1996 ka nisur karrierën e tij si sipërmarrës i suksesshëm në Shkodër.

Paralelisht, që në fillimet e demokracisë, Bushati është anëtar i Partisë Demokratike, përfaqësues komuniteti, me kontribut të vazhdueshëm dhe gjithmonë pranë bashkëqytetarëve të tij.

Prej 2007 deri në vitin 2019 ka qenë anëtar i Këshillit Bashkiak Shkodër, dhe për katër vite, 2015-2019 ka qënë Kryetar i Këshillit Bashkiak Shkodër.