Këtë të enjte në orën 12:00 skadon afati për dorëzimin e kandidaturave që duan të bëhen pjesë e garës në zgjedhjet për kreun e Partisë Demokratike. Ndërsa kryetari aktual ka depozituar tashmë dokumentacionin për garën, pritet që të shtohen formalisht edhe tre emra të tjerë.
Alesia Balliu është e para që ka shprehur gatishmërinë dhe sot pritet të depozitojë dosjen në selinë blu. Më herët, ajo ka bërë ankesë në gjykatë, duke kërkuar që të mos lejohet kandidimi i Berishës në zbatim të Statutit të PD- së, pas humbjes së zgjedhjeve politike të vitit të kaluar.
Emri i dytë është Ervin Salianji, i cili proceduralisht pengohet të kandidojë për shkak të dënimit me vendim të formës së prerë të gjykatave shqiptare, kriter përjashtues nga gara. Gjithsesi, ai ka njoftuar se do të dorëzojë dokumentacionin për pjesëmarrjen në garën për kreun e partisë më të madhe të opozitës.
Edhe Evi Kokalari, ka bërë me dije se do të dorëzojë kërkesën, aq më shumë se ajo rezulton edhe pjesë e Komisionit të Rithemelimit të PD- së, hapi i parë juridik i rimarrjes së kësaj force politike nga lidershipi aktual pas një beteje ligjore me ish- kryetarin Lulzim Basha. Në përfundim, shqyrtimi i dosjeve do të bëhet nga KOKOE e kryesuar nga Albana Vokshi, komision që do të zyrtarizojë edhe kandidatët përballë Berishës.
