Presidenti i Shteteve të Bashkuara të Amerikës, Donald Trump, është takuar këtë të martë me liderin dorëhekurt të Koresë së Veriut, Kim Jong Un, në një takim të paprecedentë dhe gati-gati, sureal. Ky është një takim historik, i cili pritet të jetë shpresëdhënës.
Dy burrat shtrënguan duart e njëri-tjetrit përpara flamujve të SHBA-ve dhe Koresë së Veriut, teksa lajmëruan nisjen e një kapitulli të ri në historinë e marrëdhënieve mes dy vendeve.
Gjatë darkës së punës, Trump tha për gazetarët:
“Ishte një takim me të vërtetë fantastik. Shumë progres. Me të vërtetë pozitiv. Mendoj se shkoi më mirë sesa e prisnim. Vërtetë mirë”.
Më herët Trump parashikoi një marrëveshje përfundimtare mbi armët bërthamore të Phenianit, gjë për të cilën kishte pohuar se do të diskutonte dhe do ta përfundonte brenda minutave të para të takimit.
Shtrëngimi historik i duarve mes Trump dhe udhëheqësit koreanoverior Kim ndodhi në mjedisin prej 12 hektarësh të hotelit luksoz Capella në ishullin Sentosa. Bisedimet u zhvilluan kokë më kokë me praninë vetëm të përkthyesve.
Pas samitit, dy udhëheqësit zhvilluan një drekë pune dhe një takim dy-palësh më të zgjeruar, ku ishin të pranishëm Sekretari i Shtetit Mike Pompeo, Shefi i Personelit të Shtëpisë së Bardhë John Kelly dhe Këshilltari për Sigurinë Kombëtare John Bolton.
Të nderuar lexues dhe vizitorë të portalit tonë! Reklamat që shfaqen, mundësojnë që ShkodraWeb të vazhdojë të jetë e lirë dhe e pandikuar në përcjelljen e të vertetës. Faleminderit nëse i klikoni!
