Pak orë kanë mjaftuar që qytetaria e shkodranëve, solidariteti për njerëzit në nevojë e vështirëri, të rishfaqet me të gjitha përmasat. Ditën e sotme, në disa pika të qytetit, individë, grupime, bisnese apo shoqata, të shqetësuar për situatën e rëndë të krijuar, të nisin mbledhjen e ndihmave për familjet në zonat e prekura nga pasojat e termetit. Dhurohen gjëra të ndryshme, nga ushqimet, tek uji dhe pijet e ndryshme, veshmbathje, batanije dhe mbulesa për të përballuar temperaturat e ulta.
Sensibilizimi është shtrirë në shumë pjesë të shoqërisë shkodrane, teksa më herët edhe Bashkia e Shkodrës ka shprehur gatishmërinë për të akomoduar në strukturat e saj 250 banorë, duke i garantuar të gjitha shërbimet. Edhe bisneset e qytetit e më gjërë, japin kontributin e tyre, siç është edhe firma “Delia” shpk që pa rënë në sy, ka nisur kontributet e veta drejt zonave të prekura nga termeti.
Përgjigja e sotme e Shkodrës e shkodranëve, duke nisur nga institucionet vendore, bisneset, grupimet, shoqatat e deri tek individët është ekzemplare dhe meritojnë një falemnderim të madh dhe publik. Shkodra e ka patur, e ka dhe do ta ketë gjithmonë zemrën e madhe dhe derën e hapur për të gjithë, sidomos në ditë të vështira si këto që po kalojmë të gjithë bashkë. Dora- dorës, në mes të dhimbjes, përpiqemi ti lehtësojmë barrën e të keqes njëri- tjetrit. FALEMINDERIT TË GJITHËVE! /ShkodraWeb/