Rektori i Universitetit të Shkodrës “Luigj Gurakuqi”, Prof. Dr. Tonin Gjuraj, zhvilloi një takim zyrtar me Prof. Dr. Vladimir Božović, Rektor i Universitetit të Malit të Zi, në kuadër të forcimit të bashkëpunimit ndërinstitucional.
Gjatë takimit, dy rektorët vlerësuan bashkëpunimin e frytshëm të deritanishëm mes dy universiteteve, të mbështetur në marrëveshjen zyrtare të bashkëpunimit, të nënshkruar që në vitin 2018, pa afat kohor. U theksua rëndësia e rezultateve të arritura në arsimin e lartë, kërkimin shkencor dhe mobilitetet akademike.
Një vëmendje e veçantë iu kushtua zgjerimit të bashkëpunimit rajonal, si element kyç për forcimin e lidhjeve akademike dhe shkëmbimin e përvojave mes universiteteve të rajonit. Po ashtu, dy rektorët ranë dakord për amendimin e marrëveshjes ekzistuese, në frymën e zhvillimeve të reja në arsimin e lartë, duke përfshirë iniciativa rajonale studimore dhe projekte të përbashkëta për Liqenin e Shkodrës.
Një çështje me rëndësi të veçantë ishte edhe vendimi i Parlamentit të Malit të Zi për hapjen dhe financimin e Institutit të Albanologjisë në Malin e Zi, si një tregues i qartë i vullnetit politik për zhvillimin e këtij institucioni. Të dy rektorët shprehën gatishmërinë për të ofruar ekspertizën akademike dhe shkencore të universiteteve përkatëse, me synim konsolidimin e këtij instituti me rëndësi të veçantë për studimet albanologjike.
Takimi u zhvillua në një frymë bashkëpunimi dhe mirëkuptimi, duke riafirmuar angazhimin e përbashkët për thellimin e marrëdhënieve institucionale dhe realizimin e projekteve të përbashkëta në të ardhmen.
