FOTO/ Punimet në Merkaton e Rusit në Shkodër vijojnë me ritme të kënaqëshme

Merkatoja e Rusit, një nga tregjet më të njohura të Shkodrës, po kalon një proces të plotë ndërhyrje. Bashkia e Shkodrës me fondet e veta, ka nisur rehabilitimin e plotë të oborrit të Merkatos, për ta kthyer në një treg në standarte bashkëkohore. Ndërsa puna ka disa javë që ka nisur, kryetarja e Bashkisë Shkodër Voltana Ademi, ashtu sië kishte premtuar, ka qënë sot për të parë ecurinë e procesit.

Ademi është njohur me ritmet e punës dhe ka bashkëbiseduar me drejtuesin e punimeve inxhinierin Fatmir Elezi, i cili e ka siguruar se projekti do të përfundojë më shpejt se afati 3- mujor i parashikuar në kontratë. Po ashtu, Elezi ka dhënë garanci të plota jo vetëm për shpejtësinë e punimeve, por edhe për cilësinë e tyre.

Nga ana e saj kryetarja Ademi është shprehur e kënaqur me ritmin e punimeve, ndërsa ka hedhur idenë e përmirësimit të mëtejshëm të projektit aktual. Kryebashkiakja ka thënë se për herë të parë pas 27 viteve, Shkodra do të ketë një treg sipas parametrave bashkëkohorë jo vetëm të tregtimit, por edhe sigurisë ushqimore për konsumatorët.