Mëngjesin e sotëm, punonjës të IKMT, të mbështetur edhe nga efektivë të Policisë së Shtetit, janë parë në hyrje të qytetit më të madh verior. Sipas informacioneve paraprake, pritet të rifillojë shembja e ndërtimeve që pengojnë zbatimin e projektit të hyrjes së Shkodrës.
Bëhet me dije se pronarë të këtyre ndërtimeve, kanë kundërshtuar ndërhyrjen me pretekstin se nuk janë njoftuar paraprakisht. Ndërkohë, në afërsi të vendit ku do të rifillojë shembja, ka patur edhe probleme të qarkullimit rrugor.
Projekti i hyrjes së Shkodrës, parasheh dublikimin e urës ekzistuese të Bahçallëkut si dhe ndërtimin e rrugës me 4 korsi deri në afërsi të Harkut të Berdicës. Puna për këtë projekt, ka nisur prej disa javësh në hyrje të Shkodrës.
