Antarët e Partisë Demokratike Shkodër janë ftuar sot të votojnë për herë të parë në historinë e 31 viteve pluralizëm, preferencën e tyre për kandidatin për kryetar të Bashkisë Shkodër me 6 mars 2022.
Votimi është hapur në orën 08.00 të mëngjesit në tre qendra votimi: Në Pallatin e Sportit “Qazim Dervishi”, në Berdicë dhe në Rrethina. Procesi do të mbyllet në orën 17.00, kur do të nisë edhe procesi i numërimit të votave.
Që në nisje, është vërejtur një interesim i lartë, sidomos në Pallatin e Sportit “Qazim Dervishi”. Demokratët janë vendosur në radhë duke pritur me durim ushtrimin e të drejtës për të përzgjedhur përfaqësuesit e tyre për Bashkinë e Shkodrës.
Komisioni i votimit ka qenë mjaft rigoroz, duke kërkuar kartën e antarësisë në PD, kartën e identitetit dhe bërë verifikimin në listën e antarëve me të drejtë vote. Do të kishte qenë më mirë të vendoseshin dy komisione votimi, meqenëse hapësira e pallatit të sportit e mundësonte.
Në garë janë 6 emra të ardhur për votim nga Komisioni i Rithemelimit i PD- së dhe konkretisht: Astrit Bushati, Irma Kopliku Alushi, Bardh Spahia, Irena Shestani Shala, Arben Maliqi dhe Alfred Koçobashi.
Deri në këto momente, nuk ka asnjë problem apo parregullësi të konstatuar në këtë proces. Në fund të tij, demokratët por edhe qytetarët e Shkodrës do të mësojnë emrin e dytë të kandidatit për Bashkinë e Shkodrës, pas Majlina Angonit të zyrtarizuar nga Partia Socialiste.
