Qumështë që zbardh rrugët e asfaltuara. Perime të stinës që flaken në rrugë. Fermerë që duan të japin një mesazh të qartë për mungesën e tregut për produktet e tyre por edhe ndryshimin e TVSH-së për këtë kategori. Deri më sot, pamje që i kemi parë kryesisht në vendet e BE-së. Nga sot, edhe në rrugët e Lushnjes e sipas gjasave, edhe në qytete të tjera.
Dramatike dhe e dhimbshme është pak të thuash kur sheh pamjet e protestës së fermerëve në Lushnjë. Ata kanë hedhur në tokë në mënyrë demonstrative prodhimet e tyre duke i shkatërruar. Pas bidonëve të qumështit që janë derdhur lumë, rruga është mbushur dhe me lakra e kastravecë, prodhime të zonës.
Kjo është e disata protestë e fermerëve kundër ndryshimit të TVSH-së për ta dhe qeverisë. Nga ana tjetër qeveria ka deklaruar se nuk do e tërheqë vendimin.
