Si rezultat i kontrolleve të intensifikuara nga shërbimet e Komisariatit të Policisë Lezhë dhe Stacionit të Policisë Shëngjin, në Malin e Rrencit u evidentua një parcelë me rreth 3334 fidanë dhe bimë të dyshuara narkotike të llojit kanabis sativa.
Gjatë ndërhyrjes nga shërbimet e Policisë u arrestua në flagrancë shtetasi Serxho Brenga, alias Serxho Matija, 30 vjeç, banues në Velipojë, Shkodër, person i shpallur në kërkim nga DVP Shkodër, për veprën penale plagosja e lehtë me dashje
Në vijim të operacionit u identifikuan dhe u shpallën në kërkim shtetasit Mateo Brenga, 25 vjeç,(vëllai i të arrestuarit) dhe Florjan Fratija, 30 vjeç, të dy banues në Velipojë , Shkodër.
Shërbimet e Komisariatit të Policisë Lezhë vijojnë punën për kapjen e tyre.
Të dy vëllezërit, Serxho Brenga dhe Mateo Brenga, rezultojnë persona të shpallur në kërkim nga DVP Shkodër, për veprën penale “Plagosja e lehtë me dashje”, kryer në bashkëpunim.
Gjatë operacionit u sekuestrua një armë gjahu, e dyshuar se përdorej për ruajtjen e parcelës. Fidanët dhe bimët narkotike u asgjësuan në vend me anë të djegies, ku një pjesë u sekuestruan në cilësinë e provës materiale.
Vijon puna për kapjen e personave të shpallur në kërkim dhe dokumentimin e plotë të veprimtarisë kriminale. Operacioni antikanabis “Koordinata” vijon.
