FOTO – Mjeku shqiptar vjen nga Amerika dhe i kalon pushimet duke vizituar falas bashkëfshatarët e tij

Shembuj të tillë nuk janë fort të zakontë, në një vend ku më së shumti flitet për korrupsion, politikë dhe krim.

Por rasti i doktor Angjelin Shtjefnit, përbën padyshim jo vetëm një lajm të mirë, por ofron edhe shpresë.


Prej disa vitesh ai është larguar nga Shqipëria dhe jeton në SHBA, por Shqipërinë e viziton thuajsë çdo verë.

Vjen për pushime, por në fakt shumicën e kohës ia kushton komunitetit të vendlindjes në Fishtë të Lezhës.

Tashmë e ka bërë traditë. Mjeku i përgjithshëm, çdo vit e shfrytëzon kohën e pushimeve në Shqipëri për të bërë vizita falas dhe analiza për banorët e zonës, si dhe të gjithë ata që kanë nevojë.

Dhe të njëjtën gjë ka bërë edhe këtë verë, ku ka takuar thuajse gjithë bashkëfshatarët.

Ai jo vetëm që i viziton falas, por me vete sjell edhe medikamente specifike për rastet e veçanta, po krejtësisht falas.

Mjeku që lindi dhe u rrit 30 metra larg shtëpisë së At Gjergj Fishtës në Fishtë të Lezhës, u largua nga Shqipëria në vitin 1996.

Ai tashmë është integruar në sistemin mjekësor të Amerikës, ku punon në një spital në Jacksonville, Florida.

Gjithsesi, ai një sy e mban vazhdimisht nga Shqipëria dhe bashkëfshatarët e tij.