Zëvendëskryeministrja shkodrane Senida Mesi, duket se ka ndryshuar “look” apo pamje duke u kthyer në vitin 2015, atëherë kur për herë të parë u shfaq publikisht në politikë si pjesë e stafit të kandidates së PS-së për Bashkinë e Shkodrës Keti Bazhdari, e cila kandidonte përballë Voltana Ademit. Siç dihet, Bazhdari humbi ndërsa Mesi nisi karrierën politike duke u bërë pjesë e Këshillit Bashkiak të Shkodrës.
Në vitin 2017, Mesi u vendos në listën fituese të PS-së në Qarkun Shkodër dhe përveç se deputete, me dëshirën e kryeministrit Edi Rama, ajo u emërua edhe zëvendëskryeministre e vendit. Nga viti 2015 dhe deri më sot, pamja e Mesit ka ndryshuar djeshëm. Ata që kuptojnë nga komunikimi publik, e kanë të lehtë ta verifikojnë, ndërsa nuk përjashtohet mundësia të jetë edhe një sinjal i mundshëm për atë që përflitet që nga shtatori 2017, kur Rama e bëri numrin 2 të qeverisë pa eksperiencë në politikën e lartë.
Siç mund ta konstatoni edhe vetë nga fotot më poshtë, Mesi hyri në politikë në vitin 2015 si “brune”, duke gjykuar të paktën nga ngjyra e flokëve. Në 2017-ën u bë një bionde që binte në sy edhe në rreshtimin e kabinetit Rama në Kuvend. Ndërsa prej pak kohësh, Mesi i është kthyer sërisht profilit të brunes. Për një zonjë jashtë politike apo jetës publike, ndryshimi i “look”-ut nuk do të binte shumë në sy. Por në rastin e Mesit, mund të lexohet edhe si një mesazh. Asnjeherë as Mesi dhe as eksponentë të lartë nuk e kanë pohuar kandidimin e zëvendëskryeministres për Bashkinë e Shkodrës. Natyrisht, nuk ka patur asnjë mohim. Në pamje të parë duket se Mesi po kërkon të krijojë një imazh ndryshe, meqenëse sipas gjasave, në 2019- ën do të ketë përballë Voltana Ademin, një bionde stoike.