Këshilli i Bashkisë Malësi e Madhe ka shpallur sot “Qytetar Nderi” patriotin dhe luftëtarin për liri, Bejto Faslia (Vukaj) pas vdekjes, Dimitrov Popaj (Popović) poet, shkrimtar dhe përkthyes dhe Zuvdija Hoxhiq (Berisha) shkrimtar i njohur në Mal të Zi me kontribute të njohura për historinë dhe kulturën shqiptare. Dekoratat e larta u dhanë me propozim të Shoqatës së Veteranëve dhe Shoqatës së Shkrimtarëve e Artistëve në M.Madhe.
Të pranishëm në sallën e Këshillit të Bashkisë ishin shkrimtarë, artistë, historianë, familjarë dhe të afërm të figurave të nderuara, krerë të shoqatave atdhetare, familjeve të dëshmorëve, veteranëve e pasardhësve të tyre etj.
Aktiviteti ka nisur me himnin e flamurit kombëtar dhe pas dhënies së titujve nga kryetari i bashkisë Marinaj, folës të ndryshëm kanë vlerësuar personat e vlerësuar por dhe Këshillin e Bashkisë, në veçanti kryebashkiakun Marinaj për kujdesin që tregojnë në respektimin e vlerave në trevën e Malësisë. I pranishëm ishte dhe deputeti shqiptar në Mal të Zi, veprimtari i njohur Nikollë Camaj.
Z. Bejto Faslija (Vukaj) (pas vdekjes) me motivacionin: “Për kontributin e tij të shquar, të një legjendari të vërtet, me armë në dorë në luftën për çlirimin e vendit nga nazi-fashistët; protogonist në luftën e Reçit bashkë me familjen e tij, i dënuar me internim nga kuislingët. Për kontributin e tij të shquar edhe në vitet e mbas luftës, në rimëkëmbjen e vendit, si një ndër drejtuesit më popullor dhe i përkushtuar të asaj kohe”.
Z. Zuvdija Hoxhiq (Berisha) me motivacionin: “Për kontributin e tij të shquar, në forcimin e marrëdhënieve dhe ndërthurjen mes dy kulturave tona, Shqipërisë dhe Malit të Zi; për ruajtjen e trashigimisë dhe kujdesin e treguar në kultivimin dhe pasqyrimin e dokeve, zakoneve dhe etnografisë shqiptare nëpërmjet veprës së tij, si shkrimtar, poet, piktor, studiues e përkthyes; si një shqiptar në origjinë, me personalitet e influencë të lartë; kontribues influent, në përkthimin dhe botimin në gjuhën Serbo-Kroate të disa autorëve shqiptare, kryesisht të M.Madhe”.
z. Dimitrov Popaj (Popoviq) me motivacionin: “Për kontributin e tij të shquar ndër vite në Shqipëri, si kuadër drejtues dhe mesimdhënës në Malësinë e Madhe dhe jashtë saj; si studiues dhe hartues i teksteve shkollore të gjuhës shqipe në Malin e Zi; shkrimtarë, poet e përkthyes, me formim profesional dhe akademik në Shqiperi; kontribues në perkthimin dhe botimin e disa autorëve shqiptare në Malin e Zi kryesisht të Malësisë së Madhe. Një ambasador i pa lodhur, që punon me përkushtim në forcimin dhe ndërthurjen mes dy kulturave, Malit të Zi dhe Shqiperisë, vendlindjes së tij të dashur.”.