Një këshilltar bashkiak në Vau- Dejës raportohet si një nga personat e prangosur ditën e sotme pas aksionit policor të koduar “Segmenti”. Bashkë me të, janë kapur nga policia edhe 3 persona të tjerë e konkretisht Nardi Malaj 45 vjeç, banues në fshatin Baks- Velipojë, Shkodër, Jozef Ndoci 34 vjeç, banues në fshatin Gomsiqe- Velipojë, Shkodër dhe Aurel Tanushi 24 vjeç, banues në fshatin Gomsiqe- Velipojë, Shkodër.
Policia e Shkodrës ka shpërndarë edhe një video për mediat lidhur me aksionin e sotëm. Sipas uniformave blu të Shkodrës është prangosur edhe 41- vjeçari Dod Dodani, banues në Mnelë të Vau- Dejësit, me detyrë Këshilltar Bashkiak në Bashkinë Vau- Dejës si i zgjedhur nga Aleanca Demokristiane.
Siç është raportuar më herët, ditën e sotme policia e Shkodrës finalizoi aksionin policor “Segmenti”, në sajë të cilit vuri në pranga katër persona pasi u kapën me një sasi prej 100 kg marijuanë, në makinën tip ‘Audi’. Ata e kishin parkuar makinën në një pikë karburanti jofunksionale, ndërkohë që drogën e kishin paketuar nëpër thasë plastikë.
Në vijim të hetimeve në banesën e vjetër të 41-vjeçarit u gjet edhe një sasi lënde e dyshuar narkotike me peshë 222 gram lëndë e dyshuar Cannabis Sativa. Ndërkohë policia ka sekuestruar edhe gjithashtu 2 automjete dhe katër telefonë celularë.
