FOTO – Kristalizohet projekti i hyrjes së Shkodrës, ja si do të ndryshojë Parku i Bexhistenit…

Hyrja e qytetit të Shkodrës, me trashëgiminë historike dhe natyrore që e karakterizon dhe me rëndësinë që ka si portë hyrëse, së shpejti do të ketë një koncept të ri zhvillimi, i cili do të marrë formë nga rikualifikimi i Parkut të Bixhistenit.

Me kërkesën e vazhdueshme të Bashkisë Shkodër drejt institucioneve shtetërore si dhe insistimin e banorëve për zgjidhjen e situatës së krijuar nga mbetjet e By-pass- it në pedonalen e Molos, Fondi Shqiptar i Zhvillimit ka angazhuar Studion SRP Group dhe arkitektin Jesús Hernández, për të dhënë një zgjidhje përfundimatare për rikualifikimin e kësaj zone kaq të frekuentuar nga të gjithë.


Sot në Tiranë u zhvillua takimi prezantues i fazës së dytë të projektit “master plani i ndërhyrjeve për hyrjen e qytetit të Shkodrës dhe rikualifikimit të bregut perëndimor të Liqenit të Shkodrës”.

Zëvendëskryetari i Bashkisë Shkodër Ardit Çylybyli, në emër të institucionit që përfaqësonte, dha mbështetjen e plotë për realizimin e këtij projekti i cili ndikon direkt në shtimin e interesit për këtë zone, duke rritur numrin e vizitorëve si dhe duke përmirësuar jetën e banorëve përmes krijimit të hapësirave të gjelbërta e rekreative.