Prej 24 orësh, vazhdojnë komentet e shumta në rrjetet sociale. Fitorja e Vllaznisë me Partizanin, barazimi me pikë me Teutën, ka bërë që shkodranët të ëndërrojnë për titullin kampion. Ndeshjen e fundit Vllaznia e luan në Shkodër me Laçin. Por ajo që vihet re, është interesi për ndeshjen e Teutës me Apoloninë në Durrës.
Aktualisht, durrësakët e shkodranit Edi Martini, për një gol më shumë në bilancin e deritanishëm, janë në krye të Superligës. Pavarësisht se edhe matematikisht, Apolonia ka rënë një kategori më poshtë, tifozët shkodranë po përpiqen të karikojnë fierakët në përballjen me Teutën, ku shpresot ta ndalojnë ose në rastin më të keq, të mos e lejojnë të shënojë shumë gola. Pasi mendohet se Vllaznia e mund lehtë Laçin.
Postimet janë me qindra dhe është e vështirë ti zgjedhësh të gjitha. Ne kemi përzgjedhur vetëm disa prej tyre, që na janë dukur më pikantet. Për të karikuar Apoloninë, në qendër të postimeve është Koço Kokëdhima, presidenti i klubit. Atij i “premtohen” mandate deputeti, konsiderohet “mbret” dhe madje, i propozohet kryebashkiakes që ta shpallë qytetar nderi.
Natyrisht, siç ndodh me shkodranët, nuk mungojnë notat e humorit në të gjitha këto postime në rrjete sociale. Vëmendja është perqendruar edhe tek këngëtarja Besa, vajza e Koços ndërsa nuk mungojnë edhe “alternativa” të tjera si “GoFundMe”, hapje llogarie për Apoloninë etj. Sigurisht, nuk ka nevojë për shumë komente, mjafton të shikoni fotot më poshtë dhe të argëtoheni të gjithë. Gjithsesi, Forca Vllaznia! Të duam Kampion! /ShkodraWeb/
