Ndjekje e çmendur, ky ishte cilësimi që media italiane ka bërë në lidhje me një ndjekje që policia e Parmës ka kryer kundrejt 3 grabitësve serialë me origjinë shqiptare.
E gjithë ngjarja është zhvilluar ditën e djeshme në orët e vona të natës, ku një makinë patrulle më në fund ka identifikuar 3 shqitarët që kishin vjedhur shumë herë në zonën e Correggios. Policët ishin detyruar të shtonin patrullat pikërisht për shkak të bastisjeve të grupit të shqiptarëve.
Ndjekja ka përfunduar me përplasjen e njërës prej makinave që ndiqte shqiptarët, dhe makinës së tyre, një BMW e vjedhur.
Pavarësisht përplasjes, ku dëmet më të mëdha i ka marrë makina e policisë, dy prej grabitësve shqiptarë kanë arritur të largohen me vrap nëpër fushat përbri rrugës, ndërsa i treti, 32 vjeçari Bardhok Lleshaj është arrestuar nga policia.
Media italiane shkruan se policia i ka identifikuar tashmë dy “skifterët” e tjerë dhe është thjesht një çështje kohe përpara se ata të kapen./Gazeta Express
