Bashkia Pukë është në proces rikualifikimi urban. Qeveria Shqiptare ka ndërmarrë projektin për rikualifikimin urban të këtij qyteti, i cili konsiston në rikonstruksionin e fasadave të ndërtesave përgjatë rrugës nga sheshi “Tërbuni” deri para Shërbimit Spitalor, ndërtimin e një shëtitore për rreth liqenit, kënd lojërash për fëmijë dhe një amfiteatër.
Ministri për Evropën dhe Punët e Jashtme, Dimir Bushati, në cilësinë e drejtuesit politik të qarkut, së bashku me deputetë të qarkut dhe me kryetarin e Bashkisë Pukë, inspektuan punimet për rigjenerim e shëtitores qendrore, të parashikuara të përfundojnë brenda qershorit të këtij viti.
Ministri Bushati vlerësoi se përfundimi i këtij projekti do të ndikojë në rigjallërimin e jetës në këtë qytet.
“Puka çdo ditë po ndryshon. Sistemi i rikualifikimit të banesave, pedonalja dhe projekti i liqenit, to ti japin një tjetër frymëmarrje Pukës”, nënvizoi ai.
Kryetari i Bashkisë Pukë, Gjon Gjonaj, nga ana e tij e falënderoi qeverinë shqiptare për investimin në këtë zonë, e cila do të sjellë dhe rritjen e turizmit në këtë zonë.
Projekti për Bashkinë Pukë është ndarë në dy faza. Ka përfunduar faza e parë, e cila ka kryer ndërtimin e pedonales së qytetit, çative të ndërtesave, ndriçimin dhe rivitalizimin e hapësirave të gjelbra, dhe ndërtimin e shatërvanit në sheshin e qytetit.
Pas gati 30 vitesh po investohet në Pukë, për t’i dhënë një fizionomi tjetër këtij qyteti, për ta bërë më tërheqës për qytetarët dhe vizitorët, për shfrytëzimin e potencialeve të turizmit apo agroturizmit.
