Aleksandër Sadikaj i cili është ekzekutuar mesditën e sotme në Tiranë rezulton pronar i një ferme të njohur në Memaliaj, i njohur si “Sancho Farm Albania”.
Sipas burimeve biznesi është hapur në janar të vitit 2022. Ajo ishte një fermë me kuaj, e ndërtuar me disa shtëpiza druri me çmime që vijon nga 40 euro deri në 100 euro në natë.
Sadikaj ka qenë duke udhëtuar nga Tirana drejt Beratit, ndërsa mësohet se jetonte me të ëmën në kryeqytet.
Atentati ka qenë i mirëmenduar, pasi shpërthimi i telekomanduar është bërë në një moment kur pranë makinës së Sadikajt, nuk ka pasur asnjë mjet tjetër, ndonëse në aksin Elbasan-Tiranë drejt kryeqytetit ka pasur një fluks mjetesh duke shkaktuar panik te qytetarët.
Me këmbë të gjymtuara, plagë të shumta në trup dhe gjakderdhje, Sadikaj arriti që të dalë vetë nga makina pas shpërthimit, por fatkeqësisht nuk mundi t’i mbijetonte plagëve të rënda që mori, ndonëse u transportua në spital.
Po ashtu, dyshohet se 27-vjeçari 6 vite më parë ka kryer një vrasje në Athinë. Ende nuk dihet nëse janë përqendruar këtu hetimet. I riu është përfshirë në një sërë ngjarjesh kriminale, tentativë vrasje dhe vjedhje në Shqipëri.