FOTO – 103 vjetori i Vllaznisë mbledh në Shkodër figurat e njohura të mundjes, Fatmir Koçi nderohet me “Mirënjohje”

103 vjetori i krijimit të Shoqnisë Vllaznia, sot Klubi Sportiv Vllaznia, ka sjellë me vete një takim mjaft të veçantë. Shoqata Kombëtare e Mundjes kishte menduar të bënte bashkë emrat më të spikatur në vite të këtij sporti, që ngjykat kuqeblu i dhanë tonin në nivel kombëtar për shumë vite.

Emocione të veçanta, takime me ish- kolegët me të cilët janë stervitur, kanë garuar, kontribuar me mund e sakrifica për Vllazninë por dhe ekipet kombëtare. Të gjithë bashkë, duke diskutuar me njëri- tjetrin, kohët e bukura të sportit por edhe vështirësitë që jo rrallë e kanë shoqëruar secilin prej këtyre sportistëve elitarë që bënë krenarë jo vetëm Vllazninë por edhe Shqipërinë.


Një nga pjesëmarrësit, Fatmir Koçi, nga bisnesmenët e parë shqiptarë pas vitit 1990, ish- pronar i televizionit të parë të lokal Shkodra TV1, ka përcjellë emocionet e këtij takim të veçantë në profilin e tij në Facebook.

“Takim emocional, mall për shokët e sportit të cilët i takova pas 34 vitesh! Ishte shumë e vështirë të përshtatja fytyrën e transformuar nga vitet. Ta dinë miqtë e mi në Facebook, se keta që shihëni në ketë foto janë mjeshtrat e mëdhenjë të sportit. Njerëz të medhenj të kohës dhe shumë të suksesshem në jetë!

Ishte 103 vjetori i Klubit Sportiv Vllaznia. Një festë e organizuar nga Shoqata Kombetare e Mundjes! I falenderoj përzëmërsisht për “Çertifikatën e Mirënjohjes” që ma dedikuan mua në këtë eveniment.”, përfundon Fatmir Koçi publikimin e tij ku emocioni është i dukshëm.

“Për kontribut të shquar si mundës i ekipit Vllaznia dhe ekipit kombëtar”, është motivacioni për ish- mundësin Fatmir Koçi. Pavarësisht se vitet kanë kaluar, mosha bën punën e vet por miqësia e lindur në sport nuk harrohet kurrë dhe është më e forta dhe më jetëgjata. Fotot e tregojnë qartë këtë më shumë se 1000 fjalë. /ShkodraWeb/