Të arrish në këtë përfundim, nuk është aspak e lehtë dhe sigurisht, luan në kufinjtë e paragjykimit për një forcë të rëndësishme politike të këtyre 36 viteve, si Partia Demokratike. Është një përfundim që arrihet lehtë, po të shohësh për shembull publikimet e këtij muaji, muajit maj, të rrjetet sociale të lidershipit lokal të PD- së por edhe në hapësira të tjera.
Numri i vajzave dhe i grave të pranishme të takimet e ristrukturimit, zgjedhjet apo emërimit të drejtuesve të rinj të PD Shkodër, në rastin më të mirë, nuk kalon gishta e një dore. Ndërsa, numri i përfaqësuesve të gjinisë tjetër, është me shumëfish më i lartë. Realisht, takimet e kësaj periudhe, janë shumë të rëndësishme për Partinë Demokratike në Shkodër dhe mungesa e gjinisë femërore, nuk kalon pa rënë në sy.
Për hir të realitetit, në Shqipëri por edhe në Shkodër, kjo forcë politike ka patur vajza e gra që janë kthyer në simbol të saj. Pa dashur të përmendim emra, ato tashmë janë të njohura dhe me kontribute në etapa të ndryshme të jetës së PD- së. Që nga qeverisja e parë dhe e dytë e vendit, deri tek vitet më të vështira të opozitës së parë dhe të dytë pas 1991- it, ato kanë patur rol përcaktues.
Paradoksalisht, nga viti në vit, pas 2013- ës, PD në qendër por edhe në bazë, ka zbehur rolin, qoftë edhe në imazh, të vajzave dhe grave. Disa syresh, janë kalcifikuar duke krijuar idenë se vetëm ato janë në PD dhe vetëm ato, meritojnë tribunat apo edhe postet qoftë në parti, qoftë edhe në segmentet bipartizane ku edhe opozita ka dhe duhet të ketë përfaqësuesit e saj.
Gratë dhe vajzat, përbëjnë gjysmën e popullsisë së Shqipërisë. Si të tilla, roli i tyre është i jashtëzakonshëm jo vetëm brenda PD- së por edhe jashtë saj, sidomos në situata zgjedhore. Është detyrim i kësaj force politike të riparojë me shpejtësi këtë gabim, i cili gradualisht po e bën të humbasë mbështetjen e gjysmës së popullsisë në vend. Dhe jo vetëm për fasadë por për ti dhënë mundësinë e garës reale në përfaqësim, qoftë në gara lokale por edhe kombëtare, fillimisht brenda partisë e më pas edhe në spektrin politik qeverisës. /ShkodraWeb/
