“Kristian, mos më luaj me dy porta Kristian”, ishte shprehja që kryeministri Edi Rama i drejtoi jo pa ton kryebashkiakut socialist së Vau Dejësit, Kristian Shkreli, në atë që mund të konsiderohet takimi i parafundit elektoral i PSSH- së në qarkun e Shkodrës.
Shumëkush, në mungesë të infoamcionit dhe jo ndjekës i rregullt i zhvillimeve politike në Shkodër, mbeti disi i çuditur: Drejtuesi më i lartë politik i drejtohet me këto fjalë, madje publikisht, kryebashkiakut të zgjedhur me siglën e partisë së tij.
Përgjigja por edhe arsyeja, ka ardhur para pak orëve, kur ka përfunduar numërimi i votave për zgjedhjet parlamentare në Bashkinë e Vau Dejësit, një nga 5 bashkitë e qarkut të Shkodrës.
PSD e Tom Doshit, është zyrtarisht forcë e parë politike me 5951 ose 44.20 % të totalit. Ajo ka lënë pas Partinë Demokratike me 4698 vota ose 34.89 %, teksa ka zbritur në vendin e tretë Partinë Socialiste me 18.43 % ose 2482 vota.
Në fakt, është në vazhdën e rezultatit të marrë nga PSD- ja e Tom Doshit edhe në zgjedhjet vendore të 14 maj 2023. Kjo parti rezultoi e para në votën për këshillin bashkiak me 27.64 % ose me 4082. Edhe asokohe, PS- ja u rendit e treta me 19.54 % ose 2885 vota, duke u kaluar në vendin e dytë nga PD- ja (Bashkë Fitojmë) me 21.93 % ose 3238 vota.
Ndërsa atëkohë, pakkush u shqetësua duke e konsideruar PSD- në aleat jo zyrtar në zgjedhjen e kryebashkiakut socialist Kristian Shkreli, në këto zgjedhje, kryeministri u detyrua të shprehej publikisht ndaj kreut të Bashkisë Vau Dejës: Kristian mos më luaj me dy porta Kristian!
Ajo që mund të konstatohet në këto zgjedhje është se Vau Dejës është kthyer në bastion të PSD- së, teksa partia e kryesuar nga Tom Doshi, është konsoliduar si e treta, me vota dhe me mandate, në nivel lokal- rajonal dhe qendror.
