Peshëngritësi Erkand Qerimaj është shpallur Kampion i Shqipërisë në kategorinë 88 kg, duke zhvilluar një paraqitje të jashtëzakonshme dhe duke thyer plot 6 rekorde kombëtare.
Qerimaj e nisi garën në stilin e shkëputjes me një seri rezultatesh shumë të larta, ku ngriti 149 kg, duke vendosur rekord kombëtar që në provën e parë. Ai vijoi me 151 kg dhe më pas me 153 kg, duke përmirësuar sërish rekordin kombëtar dhe duke konfirmuar formën e tij shumë të mirë sportive.
Edhe në stilin e shtytjes, kampioni shqiptar dominoi konkurrencën, duke realizuar 170 kg në provën e parë, ndërsa në provën e dytë ngriti 176 kg, rezultat që shënoi rekord kombëtar në dygarësh. Në provën e tretë ai ngriti 181 kg, duke vendosur një tjetër rekord kombëtar dhe duke kompletuar një garë perfekte.
Në total, Erkand Qerimaj realizoi me sukses të 6 provat (3 në shkëputje dhe 3 në shtytje), duke u shpallur kampion absolut dhe duke treguar një nivel shumë të lartë përpara Kampionatit Europian që do të zhvillohet në muajin prill në Batumi, Georgia.
Kjo garë shërbeu si një test i rëndësishëm për formën e sportistit shqiptar, i cili synon rezultate të larta edhe në arenën ndërkombëtare.
