Prej katër ditësh, Edison Oruqi, banues në lagjen “Kiras” të Shkodrës, është zhdukur në rrethana misterioze. Ai ishte duke punuar në lumin e Shalës kur humbi kontaktet me familjen. Sipas bashkëpunëtorëve dhe familjes, Edisonin e kanë parë për herë të fundit duke punuar në një bujtinë.
Skënder Pepkolaj, kolegu i tij i punës, deklaron se Edisonin e mori vëllai i pronarit të bujtinës për të transportuar materiale ndërtimi, duke i premtuar se do ta kthente të nesërmen. Pas përfundimit të punës, Pepkolaj u informua se Edisoni ishte lënë në një ishull të vogël me rërë.
Ka qenë pikërisht Pepkolaj që ka bërë denoncimin në polici për zhdukjen e tij. Deri më tani, policia e Shkodrës ka kryer disa kontrolle në lumin e Shalës, por ende pa asnjë rezultat. Familjarët apelojnë për ndihmë, ndërsa misteri mbetet i pazgjidhur.
