Sot në Komisariatin e Policisë së Lezhës është shoqëruar avokati Gjergj Neli. Raportohet se ai është marrë forcërisht nga zyra e avokatisë ku po punonte, në prani të bashkëshortes së tij, e cila është zëvendëskryetare e dhomës së avokatisë Lezhë, Shaqe Marinaj.
Marinaj para mediave ka treguar se ishte oficeri Myrteza Mehmeti, i cili ka marrë forcërisht dhe ka dhunuar atë.
Teksa shprehet se oficeri në fjalë dhunon edhe të mitur në Komisariat, Marinaj ka njoftuar se ka tentuar të telefonojë shefin e SHÇKB-së për të bërë një denoncim mbrëmjen e sotme.
Pjesë nga deklarata:
Shaqe Marinaj: Efektivi quhet Myrteza Mehmeti. Ndaj tij janë bërë kallëzime edhe nga persona të tjerë, i cili përdor dhunë edhe ndaj të miturit në Komisariatin e policisë, sa herë që bëhen shoqërime dhe një rast ndër to është ai që edhe ne e kemi denoncuar para trupit gjykues në Shkodër. Që nga ky moment ky zotëri mundohet të sjellë konflikte dhe për arsye të denoncimit që do bëja unë që edhe në këtë moment më dhemb supi dhe koka, nga dhuna që ushtroi ndaj avokatit që shoqëroi, duke qenë unë mes tyre dhe duke më sjellë mua.
I kërkova disa herë: “Të lutem shef mos agravo në dhunë”. Jemi njerëz publikë, jemi njerëz që i shërbejmë qytetarëve që i drejtohen zyrës sonë ligjore.
Kam njoftuar shefin e SHÇKB-së në drejtorinë e Policisë Lezhë dhe i kam kërkuar që unë sonte dua të bëj një denoncim ndaj një punonjësi të Policisë së Shtetit, sepse në këtë shtet nuk jemi të sigurt për jetën tonë. /Burimi: PanoramA/
NJOFTIMI I POLICISË
Më datën 27.10.2020 rreth orës 15:10, në sallën operative të DVP ka ardhur një telefonatë për një konflikt, në afërsi të hotel turizmit Lezhë.
Menjëherë kanë shkuar shërbimet e Policisë në adresën e dhënë, ku kanë konstatuar shtetasin Gj.N.,dhe bashkëshorten e tij shtetasen Sh.M.,me profesion avokat duke u konfliktuar me një shtetas.
Punonjësit e Policisë kanë ndërhyrë për të penguar përshkallëzimin e mëtejshëm të konfliktit, por shtetasi Gj.N., i ka kundërshtuar me dhunë duke goditur me grusht dhe grisur bluzen njërit prej punonjësve të Policisë.
Shtetasi Gj.N.u shoqerua në Komisariatin e Policisë Lezhë.
Në vijim të veprimeve nga oficeri i Prokurorisë së Rrethit Gjyqësor Lezhë u bë arrestimi në flagrancë i shtetasit Gj.N.,68 vjeç, banues në Lezhë.
Materialet hetimore i kaluan Prokurorisë së Rrethit Gjyqësor Lezhë, për veprime të mëtejshme për vepren penale “Kundërshtimi me dhunë i punonjësit të rendit publik”.
