Arratisje nga burgu si në film – dhe nuk është hera e parë për Taulant Tomën, i dënuarin që u largua nga burgu i Operas. Ngjarja ndodhi natën mes së shtunës dhe së dielës, më 7 dhjetor, kur ai preu hekurat e qelisë dhe doli jashtë duke përdorur çarçafë të lidhur. Më pas u zhduk pa lënë gjurmë.
Sipas hetimeve paraprake, arratisja dyshohet të ketë ndodhur gjatë ndërrimit të turnit të rojave dhe ishte përgatitur deri në detajin më të vogël, gjë që shpjegon shpejtësinë me të cilën u realizua. Ende nuk dihet se si ia doli të kalonte murin e lartë rrethues të burgut, dhe as nëse ka pasur ndihmën e ndonjë bashkëpunëtori jashtë.
Arratisjet e mëparshme
Kjo nuk është arratisja e tij e parë. Taulanti, i dënuar për vjedhje dhe grabitje (me dënim që përfundon në vitin 2041), në shkurt të vitit 2013 arriti të ikte nga burgu i Parmës, një tjetër institucion i sigurisë së lartë. Atëherë ai iku së bashku me bashkatdhetarin Valentin Frrokaj , i cili më vonë u vra nga një argjendar gjatë një grabitjeje në një vilë.
Taulanti u arrestua sërish në Belgjikë në shtator të po atij viti. U dërgua në burgun e Latinës, pranë qytetit Liezh, por në dhjetor ai u arratis edhe prej andej. Ndërkohë, në vitin 2009 ai kishte mundur të largohej edhe nga burgu i Ternit.
Operacioni i kërkimit
Prefektura ka nisur një operacion të gjerë kërkimi. Janë vendosur postblloqe dhe po kontrollohen zonat rurale dhe ato industriale. Megjithatë, ekziston frika se Taulanti mund të ketë arritur tashmë të largohet nga zona.
