Zyrtarisht, procesi i deklarimit po vetëdeklarimit të kandidaturave edhe për garën e primareve në bashkinë Shkodër, është mbyllur në orën 20.00 të datës 12 nëntor 2022.
ShkodraWeb ka arritur të sigurojë emrat e propozuar nga antarësia demokrate si kandidatë për primaret, nga të cilat do të dalë kandidati zyrtar i PD- së për bashkinë e Shkodrës.
Vlen të theksohet, se ky është vetëm hapi i parë drejt garës që vertetë. Emrat e propozuar, jo domosdoshmërisht janë kandidatë për primaret. Ata që kanë dëshirë të vijojnë garën, duhet të plotësojnë edhe dokumentacion me shkrim, i cili duhet depozituar pranë selisë qendrore të PD- së në Tiranë. Nëse dokumentacioni nuk plotësohet, kandidati për primare konsiderohet i skualifikuar.
Ndërkohë, emrat e porpozuar nga antarësia e PD- së Shkodër janë: Bardh Spahia, Arben Lushaj, Lorenc Luka, Voltana Ademi, Irena Shestani, Nesti Kiri, Artur Luka dhe Ervin Gjini. Ndërkohë, është edhe një kandidat i vetëofruar, për të cilin nuk ka shumë informacion. Dihet se jeton në Shtetet e Bashkuara të Amerikës dhe është ndër të parët që ka paraqitur kandidaturën.
Fillimisht, do të shihet se cili nga emrat e mësipërm do të plotësojë dokumentacionin për fazën tjetër, duke e depozituar në selinë e PD- së në Tiranë. Më pas, do të jetë Kryesia e PDSH- së që do të marrë në shqyrtim kanidaturat, nga të cilat do të bëjë edhe përzgjedhjen. Më pas, këto emra, do të dërgohen për votimin “një antar, një votë” nga antarësia dhe simpatizantët e PD- në Shkodër.
Ndryshe nga degët e tjera të PD- së në shumë bashki të vendit, asnjë nga kandidatët e propozuar nga antarësia demokrate e Shkodrës, nuk ka preferuar të bëjë prezantim zyrtar në selinë blu në Tiranë. Mbase pritet zyrtarizimi final i emrave që të përmbushet edhe kjo procedurë, para nisjes së rreth 3 javëve që kandidatët kanë në dispozicion për fushatën brenda degës ku kandidojnë.
Fituesi që do të dalë nga primaret, ku parashikohet edhe balotazhi, do të jetë kandidati zyrtar i PD- së për bashkinë Shkodër me 14 maj 2023. Me shumë mundësi, do të ketë përballë Benet Becin nga PS- ja, kandidatura e të cilit thuajse është zyrtarizuar pasditen e të premtes në një mbledhje të Asamblesë së zgjeruar të bashkisë Shkodër. /ShkodraWeb/
