Ora 24.00 e të hënës, ka shënuar përfundimin e afatit për depozitimin e emrave që do ti nënshtrohen “primareve” sipas orientimeve të Komisionit të Rithemelimit të PD- së. Mësohet se seksionet dhe grupseksionet e PD- së, kanë bërë propozimet e emrave konkretë të kandidatëve për kryetar të Bashkisë Shkodër për zgjedhjet vendore të pjesshme të 6 marsit.
Emrat e përzgjedhur, pasi janë hartuar procesverbalet për çdo seksion dhe janë firmosur nga kryetarët e tyre, janë dërguar në qendër pranë Komisionit të Rithemelimit në Tiranë. Ashtu siç është paralajmëruar, demokratët shkodranë do të shprehin preferencat e tyre për emrat, duke votuar ata që mendojnë se janë të përshtatshëm për të qenë kandidatë.
Më herët, Komisioni i Rithemelimit do të përcaktopjë kandidatët që plotësojnë kriteret për të kandiduar, sipas udhëzimit të shpërndarë para nisjes së kësij procesi. Në ditët në vijim, pritet që anëtarësia të përzgjedhë emrin apo emrat, sipas udhëzimit që do të dalë nga Komisioni i Rithemelimit për degët vendore.
Ndërkohë, grupseksionet kanë propozuar emrat e kandidatëve, ku janë propozuar kryebashkiakja aktuale e Shkodrës Voltana Ademi, ish- kandidati për deputet i PD- së Bardh Spahia, nënkryetarët e PD- së Shkodër Irena Shestani, Ndoc Ashta dhe Bashkim Rroji, antarët e kryesisë Ervin Gjini dhe Arben Lushaj, kryetari i FRPD- së Arvit Bushati, nënkryetari i Bashkisë Shkodër Ardit Qylybyli, ish- kryebashkiaku Lorenc Luka, ish- kryetari i PD- së Shkodër Astrit Bushati etj. Lista e emrave të propozuar është më e gjatë, por këto janë emrat kryesorë të propozuar nga strukturat e PD- së Shkodër.
Gara zgjedhore do të jetë për të përmbyllur mandatin e nisur me 30 qershor 2019, teksa në pranverën e ardhshme, do të zhvillohet zgjedhjet vendore të radhës. Me shumë mundësi, në harkun zgjedhor 15 prill- 15 maj 2023.
