Kryeministri Edi Rama duket se ka përdorur sistemin e listës së hapur për të realizuar një spastrim të heshtur politik brenda Partisë Socialiste.
Me një strategji të qartë dhe të mirëmenduar, shumë prej figurave të vjetra dhe me mandate të gjata parlamentare u lanë në mëshirën e votës preferenciale, një bast që shumica prej tyre e humbën.
Në Tiranë, Pandeli Majko, një prej emrave simbolikë të PS-së dhe ish-kryeministër, nuk arriti të sigurojë mandatin, me vetëm 3,600 vota preferenciale. Mimi Kodheli dhe Ermonela Felaj, gjithashtu me karrierë të gjatë parlamentare, morën pak vota, duke mbetur jashtë legjislaturës së re. Po ashtu Klotilda Bushka, kryetare e Komisionit të Ligjeve, me vetëm 2,639 vota, është një tjetër emër i spostuar nga skena parlamentare.
Lista e të “spastruarve” përfshin edhe Etilda Gjonajn, Toni Gogun, Plarent Ndrecën, Arben Pëllumbin, Etjen Xhafajn e deri te Luan Duzha, Dasantila Tahiraj, Florenc Spaho, Nustret Avdulla, dhe Enslemvera Zake, të gjithë me rezultate që nuk i siguruan një vend në Kuvend.
Ende në garë për mandat janë Olta Xhaçka, e cila përballet me Blerina Gjylamentin, dhe Ornaldo Rakipi, që garon kokë më kokë me Xhemal Qefalian në Tiranë.
Por duhet theksuar se ende nuk ka nisur numërimi i votës preferenciale nga diaspora dhe në disa zona mund të kemi ndryshime. Por duke parë shifrat, rezultati mund të ndryshojë tek tuk, pasi ata që kanë siguruar mandatin kanë rezultat shumë të thellë.
Deputetët që mbeten jashtë deri më tani:
1. Ornaldo Rakipi (në garë me Xhemal Qefalinë)
2. Olta Xhaçka (në garë me Blerina Gjylamentin)
3. Etilda Gjonaj
4. Plarent Ndreca
5. Pandeli Majko
6. Ermonela Felaj (Valikaj)
7. Mimi Kodheli
8. Klotilda Bushka
9. Toni Gogu
10. Arben Pëllumbi
11. Etjen Xhafaj
12. Ilir Ndraxhi
13. Alban Xhelili
14. Luan Duzha
15. Dasantila Tahiraj
16. Florenc Spaho
17. Nustret Avdulla
18. Enslemvera Zake
19. Edona Bilali
